Эрзянь культурань центра Отяжбуе...
Эрзянь культурань центра Отяжбуесэ
Эрзянь культурань центра Отяжбуесэ
Меельце шкасто финнэнь-угрань раськетне седе ламо кармасть явомо мель эсест культурань кастомантень ды «финнэнь-угрань» брендэсь ней содави лия мастортнэнь томбалеяк. Кецявты сеяк: эрзятне ды мокшотне кармасть чарькодеме тиринь культуранть эряви кепедемс. Паряк ламо мезе а топавтови арсематнень коряс, теке марто неявить покшт эскелькст.
Истя, монь тиринь Отяжбуень районось свал лововсь теке алкуксонь эрзянь. Ды а стяко. Ломантнень ламочист коряс сон ловови сехте эрзянь. Седе эрзяв тарка а муят весе масторлангонть келес. Тюштянь пингстэ саезь тесэ вечкить, ванстыть ды кастыть эсест эрзянь тевтнень. Пек сюпав минек модась талантов ломаньсэ. Тесэ мазыйстэ морыцят, сёрмадейть, чувтосто керсицят, артыцят, кодыцят ды седе тов. Ансяк вана сынь ёртнезь весе буенть келес ды сеедьстэ истят ломантнесэ а содыть. А стяко меельце шкасто Отяжбуес (п. Атяшево) ульнесь арсезь путомс «Республикань эрзя раськень культурань ды ремёслатнень центра» (Республиканский эрзянский центр национальной культуры и ремесел). Арсеманть коряс тесэ кармить пурназь весе «сырнень» эрзянь кедтне. Те чис сынст марто теезь кеме сюлмот ды ней моли покш важодема цетранть юронть путомасо-стявтомасо. Центранть алов кармить путозь пек ламо таркат, конатне, кемтяно, кармить алкукс кастомо эрзятнень культураст. Сонзэ эйсэ:
1. РДК-нь кудо, косо улить:
- кинонь ды актовой зал;
- хореографиянь класс;
- искусствань школа (музыкань ды шкинемань);
- эйкакшонь шкинема кудо;
- музей;
- дискотекань тарка кафе-бар марто;
- тевдеемань (административной) таркат;
- спортонь залт (эрзянь «Тюштянь тюрема», фитнес, бильярд)
2. Эрьва кодамо кудоютконь шкинемань мастерской (тарадсто кодамо, чувтосто керсема, викшнема, кшнинь солавтома ды теема, скульптура ды седе тов)
3. Инжень кудо (гостиница);
4. Эрзянь ресторан;
5. Этнографиянь комплекс, козонь совить эрзянь чувтонь кудось ды кудонть перька эрьва кодат кардазт (кузниця, кардаз, мацт, амбар, раужо баня), лисьма, пире.
Эряви тешкстамс, центранть панжомадо мейле минек буесэ теевить пек ламо од важодема таркат. Истя тесэнь эрзятне кармить лиялеме эсест тиринь модаст лангс ды раштамо эйкакшт, путомо кудот. Истя, аламонь-аламонь витевить минек тевтне паро ёнов.
Вана истямо важодема моли монь тиринь Отяжбуесэ. Карматано кемеме, те центрась карми содавикс весе масторонть келес ды весе масторонть келес карми сравтомо эрзянь культуранть сюпавчинзэ, питнечинзэ, мазычинзэ. Весень мельспаросо учотано инжекс Отяжбуесэ, кезэрень эрзянь мода лангсо.
Дополнительная информация
из
из
из
из
из